Ang tulang ito ay para sa babaeng nagpapakilig sa akin araw-araw, gabi-gabi.
Sa mundong ito na lipos ng tunog
Saan mang dako ay may kumakalabog
Kahit sa gabing bawat isa'y mahimbing ang tulog
Sa umaga'y gigisingin ng kampana tumutunog.
Saan mang sulok, teknolohiya'y di na kaila
Patok na sosyal midya, iyo na ring isama
Facebook, twitter, tiktok at may messenger pa
Inihahatid nila'y kakaiba at modernong ligaya.
"Ting!", matinis na tunog na maririnig mo
Tuwing bubuksan ang messenger sa selpon mo
Bawat mensahe nati'y parang pinagtatagpo
Sabik na sabik sa pag-ibig nating mga puso .
Sa messenger, tiyak naman na ako'y nagaganahan
Pagsapit ng umaga, ginagawa ko itong agahan
Pagkat matamis na mensahe mo'y kaysarap masilayan
Busog na damdamin, ramdam hanggang sa
hapunan.
Sa modernong messenger, ako sayo'y nagsabi
Kung maaari ba kitang ibigin o aking binibini
Kayat araw-araw aking ginugugol matatamis na sandali
Sa bawat 'Ting!' na tunog sa selpon, ako'y napapangiti.